Poem by Andrew Lang

Ballade of the Royal Game of Golf

(East Fifeshire)

There are laddies will drive ye a ba'
To the burn frae the farthermost tee,
But ye mauna think driving is a',
Ye may heel her, and send her ajee,
Ye may land in the sand or the sea;
And ye're dune, sir, ye're no worth a preen,
Tak' the word that an auld man'll gie,
Tak' aye tent to be up on the green!

The auld folk are crouse, and they craw
That their putting is pawky and slee;
In a bunker they're nae gude ava',
But to girn, and to gar the sand flee.
And a lassie can putt – ony she, – 
Be she Maggy, or Bessie, or Jean,
But a cleek-shot's the billy for me,
Tak' aye tent to be up on the green!

I hae play'd in the frost and the thaw,
I hae play'd since the year thirty-three,
I hae play'd in the rain and the snaw,
And I trust I may play till I dee;
And I tell ye the truth and nae lee,
For I speak o' the thing I hae seen – 
Tom Morris, I ken, will agree – 
Tak' aye tent to be up on the green!

ENVOY

Prince, faith you're improving a wee,
And, Lord, man, they tell me you're keen;
Tak' the best o' advice that can be,
Tak' aye tent to be up on the green!

1. May Colven
2. Melville and Coghill - The Place of the Little Hand
3. Dizain
4. Ballade of the Tweed
5. On Calais Sands

Print

1146 Views

Last Poems

To Russian version