Poem by David Sillar

Epistle to R. Burns

1.

While Reekie’s Bards your Muse commen’,
An’ praise the numbers o’ your pen,
Accept this kin’ly frae a frien’,
		Your Dainty Davie,
Wha ace o’ hearts does still remain,
		Ye may believe me.

2.

I ne’er was muckle gi’en to praisin’,
Or else ye might be sure o’ fraisin’:
For trouth I think, in solid reason,
		Your kintra reed
Plays sweet as ROBIN FERGUSSON’,
		Or his on Tweed. 

3.

Your Luath, Cæsar bites right fair;
An’ when ye paint the Holy Fair,
Ye draw it to a very hair;
		Or when ye turn,
An’ sing the follies o’ the Fair,
		How sweet ye mourn!

4.

Let Coila’s plains wi’ me rejoice,
An’ praise the worthy Bard, whose lays
Their worth an’ beauty high doth raise
		To lasting fame;
His works, his worth will ever praise,
		An’ crown his name.

5.

Brave RAMSAY now an’ FERGUSSON,
Wha hae sae lang time fill’d the Throne
O’ Poetry, may now ly down
		Quiet i’ their urns,
Since fame, in justice, gies the crown
		To Coila’s BURNS.

6.

Hail! happy Bard! ye’re now confest
The king o’ singers i’ the West:
EDINA hath the same exprest;
		Wi’ joy they fin’
That ye’re, when try’d by Nature’s test,
		Gude sterlin’ coin.

7.

Sing on my frien’; your fame’s secur’d,
An’ still maintain the name o’ Bard;
But yet tak tent an’ keep a guard:
		For envy’s tryin’
To blast your name; mair just reward
		For the envyin’.

8.

But tho’ the tout o’ fame may please you,
Letna the flatt’rin’ ghaist o’erheeze you:
Nier flyte nor fraise tae gar fock roose you:
		For men o’ skill,
When ye write weel, will always praise you
		Out o’ gude will.

9.

Great numbers on this earthly ba’,
As soon as death gies them the ca’,
Permitted are to slide awa’
		An’ straught forgot –
Forbid that ever this should fa’
		To be your lot.

10.

I ever had an anxious wish;
Forgive me, Heav’n! if ’twas amiss,
That fame in life my name would bless,
		An’ kin’ly save
It from the cruel tyrant’s crush,
		Beyond the grave.

11.

Tho’ th’ fastest liver soonest dies,
An’ length o’ days sud mak ane wife;
Yet haste wi’ speed, to glory rise
		An’ spur your horse;
They’re shortest ay wha gain the prize
		Upo’ the course.

12.

Sae to conclude, auld Frien’ an’ Neebor,
Your Muse forgetna weel to feed her,
Then steer thro’ life wi’ birr an’ vigour,
		To win a horn,
Whase soun’ shall reach ayont the Tiber,
		Mang ears unborn.

1. Epistle to J**N G****E, a Famous Theologist and Astronomer
2. Verses, Occasioned by a Reply to Burns’ Calf by an Unco Calf
3. Epistle to the Critics
4. Song IV
5. Money Makes the Mare to Go

Print

1876 Views

Last Poems

To Russian version