Robert Burns

My Hoggie

WHAT will I do gin my Hoggie die?
  My joy, my pride, my Hoggie!
My only beast, I had na mae,
  And vow but I was vogie!

The lee-lang night we watch’d the fauld,
  Me and my faithfu’ doggie;
We heard nought but the roaring linn,
  Amang the braes sae scroggie;

But the howlet cried frae the castle wa’,
  The blitter frae the boggie,
The tod replied upon the hill,
  I trembled for my Hoggie.

When day did daw, and cocks did craw,
  The morning it was foggie;
An’ unco tyke lap o’er the dyke,
  And maist has kill’d my Hoggie.