English poetry

PoetsBiographiesPoems by ThemesRandom Poem
The Rating of PoetsThe Rating of Poems

Poem by William Dunbar


The Tretis of the Twa Mariit Women and the Wedo


Apon the Midsummer evin, mirriest of nichtis,
I muvit furth allane, neir as midnicht wes past,
Besyd ane gudlie grein garth, full of gay flouris,
Hegeit, of ane huge hicht, with hawthorne treis;
Quhairon ane bird, on ane bransche, so birst out hir notis
That never ane blythfullar bird was on the beuche harde:
Quhat throw the sugarat sound of hir sang glaid,
And throw the savour sanative of the sueit flouris,
I drew in derne to the dyk to dirkin efter mirthis;
The dew donkit the daill and dynnit the feulis.
I hard, under ane holyon hevinlie grein hewit,
Ane hie speiche, at my hand, with hautand wourdis;
With that in haist to the hege so hard I inthrang
That I was heildit with hawthorne and with heynd leveis:
Throw pykis of the plet thorne I presandlie luikit,
Gif ony persoun wald approche within that plesand garding.

I saw thre gay ladeis sit in ane grene arbeir,
All grathit in to garlandis of fresche gudlie flouris;
So glitterit as the gold wer thair glorius gilt tressis,
Quhill all the gressis did gleme of the glaid hewis;
Kemmit was thair cleir hair, and curiouslie sched
Attour thair schulderis doun schyre, schyning full bricht;
With curches, cassin thair abone, of kirsp cleir and thin:
Thair mantillis grein war as the gress that grew in May sessoun,
Fetrit with thair quhyt fingaris about thair fair sydis:
Off ferliful fyne favour war thair faceis meik,
All full of flurist fairheid, as flouris in June;
Quhyt, seimlie, and soft, as the sweit lillies
New upspred upon spray, as new spynist rose;
Arrayit ryallie about with mony rich vardour,
That nature full nobillie annamalit with flouris
Off alkin hewis under hevin, that ony heynd knew,
Fragrant, all full of fresche odour fynest of smell.
Ane cumlie tabil coverit wes befoir tha cleir ladeis,
With ryalle cowpis apon rawis full of ryche wynis.
And of thir fair wlonkes, tua weddit war with lordis,
Ane wes ane wedow, I wis, wantoun of laitis.
And, as thai talk at the tabill of many taill sindry,
Thay wauchtit at the wicht wyne and waris out wourdis;
And syne thai spak more spedelie, and sparit no matiris.

Bewrie, said the Wedo, ye woddit wemen ying,
Quhat mirth ye fand in maryage, sen ye war menis wyffis;
Reveill gif ye rewit that rakles conditioun?
Or gif that ever ye luffit leyd upone lyf mair
Nor thame that ye your fayth hes festinit for ever?
Or gif ye think, had ye chois, that ye wald cheis better?
Think ye it nocht ane blist band that bindis so fast,
That none undo it a deill may bot the deith ane?

Than spak ane lusty belyf with lustie effeiris;
It, that ye call the blist band that bindis so fast,
Is bair of blis, and bailfull, and greit barrat wirkis.
Ye speir, had I fre chois, gif I wald cheis better?
Chenyeis ay ar to eschew; and changeis ar sueit:
Sic cursit chance till eschew, had I my chois anis,
Out of the chenyeis of ane churle I chaip suld for evir.
God gif matrimony were made to mell for ane yeir!
It war bot merrens to be mair, bot gif our myndis pleisit:
It is agane the law of luf, of kynd, and of nature,
Togiddir hairtis to strene, that stryveis with uther:
Birdis hes ane better law na bernis be meikill,
That ilk yeir, with new joy, joyis ane maik,
And fangis thame ane fresche feyr, unfulyeit, and constant,
And lattis thair fulyeit feiris flie quhair thai pleis.
Cryst gif sic ane consuetude war in this kith haldin!
Than weill war us wemen that evir we war fre;
We suld have feiris as fresche to fang quhen us likit,
And gif all larbaris thair leveis, quhen thai lak curage.
My self suld be full semlie in silkis arrayit,
Gymp, jolie, and gent, richt joyus, and gent ryce.
I suld at fairis be found new faceis to se;
At playis, and at preichingis, and pilgrimages greit,
To schaw my renone, royaly, quhair preis was of folk,
To manifest my makdome to multitude of pepill,
And blaw my bewtie on breid, quhair bernis war mony;
That I micht cheis, and be chosin, and change quhen my lykit.
Than suld I waill ane full weill, our all the wyd realme,
That suld my womanheid weild the lang winter nicht;
And when I gottin had ane grome, ganest of uther,
Yaip, and ying, in the yok ane yeir for to draw;
Fra I had preveit his pitht the first plesand moneth,
Than suld I cast me to keik in kirk, and in markat,
And all the cuntre about, kyngis court, and uther,
Quhair I ane galland micht get aganis the nixt yeir,
For to perfurneis furth the werk quhen failyeit the tother;
A forky fure, ay furthwart, and forsy in draucht,
Nother febill, nor fant, nor fulyeit in labour,
But als fresche of his forme as flouris in May;
For all the fruit suld I fang, thocht he the flour burgeoun.

I have ane wallidrag, ane worme, ane auld wobat carle,
A waistit wolroun, na worth bot wourdis to clatter;
Ane bumbart, ane dron bee, ane bag full of flewme,
Ane skabbit skarth, ane scorpioun, ane scutarde behind;
To see him scart his awin skyn grit scunner I think.
Quhen kissis me that carybald, than kyndillis all my sorow;
As birs of ane brym bair, his berd is als stif,
Bot soft and soupill as the silk is his sary lume;
He may weill to the syn assent, bot sakles is his deidis.
With goreis his tua grym ene ar gladderrit all about,
And gorgeit lyk twa gutaris that war with glar stoppit;
Bot quhen that glowrand gaist grippis me about,
Than think I hiddowus Mahowne hes me in armes;
Thair ma na sanyne me save fra that auld Sathane;
For, thocht I croce me all cleine, fra the croun doun,
He wil my corse all beclip, and clap me to his breist.
Quhen schaiffyne is that ald schalk with a scharp rasour,
He schowis one me his schevill mouth and schedis my lippis;
And with his hard hurcheone skyn sa heklis he my chekis,
That as a glemand gleyd glowis my chaftis;
I schrenk for the scharp stound, bot schout dar I nought,
For schore of that auld schrew, schame him betide!
The luf blenkis of that bogill, fra his blerde ene,
As Belzebub had on me blent, abasit my spreit;
And quhen the smy one me smyrkis with his smake smolet,
He fepillis like a farcy aver that flyrit one a gillot.
Quhen that the sound of his saw sinkis in my eris,
Than ay renewis my noy, or he be neir cumand:
Quhen I heir nemmyt his name, than mak I nyne crocis,
To keip me fra the cummerans of that carll mangit,
That full of eldnyng is and anger and all evill thewis.
I dar nought luke to my luf for that lene gib,
He is sa full of jelusy and engyne fals;
Ever ymagynyng in mynd materis of evill,
Compasand and castand casis a thousand
How he sall tak me, with a trawe, at trist of ane othir:
I dar nought keik to the knaip that the cop fillis,
For eldnyng of that ald schrew that ever one evill thynkis;
For he is waistit and worne fra Venus werkis,
And may nought beit worth a bene in bed of my mystirs.
He trowis that young folk I yerne yeild, for he gane is,
Bot I may yuke all this yer, or his yerd help.
Ay quhen that caribald carll wald clyme on my wambe,
Than am I dangerus and daine and dour of my will;
Yit leit I never that larbar my leggis ga betueene,
To fyle my flesche, na fumyll me, without a fee gret;
And thoght his pene purly me payis in bed,
His purse pays richely in recompense efter:
For, or he clym on my corse, that carybald forlane,
I have conditioun of a curche of kersp allther fynest,
A goun of engranyt claith, right gaily furrit,
A ring with a ryall stane, or other riche jowell,
Or rest of his rousty raid, thoght he wer rede wod:
For all the buddis of Johne Blunt, quhen he abone clymis,
Me think the baid deir aboucht, sa bawch ar his werkis;
And thus I sell him solace, thoght I it sour think:
Fra sic a syre, God yow saif, my sueit sisteris deir!

Quhen that the semely had said her sentence to end,
Than all thai leuch apon loft with latis full mery,
And raucht the cop round about full of riche wynis,
And ralyeit lang, or thai wald rest, with ryatus speche.

The wedo to the tothir wlonk warpit ther wordis;
Now, fair sister, fallis yow but fenyeing to tell,
Sen man ferst with matrimony yow menskit in kirk,
How haif ye farne be your faith? confese us the treuth:
That band to blise, or to ban, quhilk yow best thinkis?
Or how ye like lif to leid in to leill spousage?
And syne my self ye exeme one the samyn wise,
And I sall say furth the south, dissymyland no word.

The plesand said, I protest, the treuth gif I schaw,
That of your toungis ye be traist. The tothir twa grantit;
With that sprang up hir spreit be a span hechar.
To speik, quoth scho, I sall nought spar; ther is no spy neir:
I sall a ragment reveil fra rute of my hert,
A roust that is sa rankild quhill risis my stomok;
Now sall the byle all out brist, that beild has so lang;
For it to beir one my brist wes berdin our hevy:
I sall the venome devoid with a vent large,
And me assuage of the swalme, that suellit wes gret.

My husband wes a hur maister, the hugeast in erd,
Tharfor I hait him with my hert, sa help me our Lord!
He is a young man ryght yaip, bot nought in youth flouris;
For he is fadit full far and feblit of strenth:
He wes as flurising fresche within this few yeris,
Bot he is falyeid full far and fulyeid in labour;
He has bene lychour so lang quhill lost is his natur,
His lume is waxit larbar, and lyis in to swonne:
Wes never surgeorne wer set na one that snaill tyrit,
For efter vii oulkis rest, it will nought rap anys;
He has bene waistit apone wemen, or he me wif chesit,
And in adultre, in my tyme, I haif him tane oft:
And yit he is als brankard with bonet one syde,
And blenkand to the brichtest that in the burgh duellis,
Alse curtly of his clething and kemmyng of his hair,
As he that is mare valyeand in Venus chalmer;
He semys to be sumthing worth, that syphyr in bour,
He lukis as he wald luffit be, thocht he be litill of valour;
He dois as dotit dog that damys on all bussis,
And liftis his leg apone loft, thoght he nought list pische;
He has a luke without lust and lif without curage;
He has a forme without force and fessoun but vertu,
And fair wordis but effect, all fruster of dedis;
He is for ladyis in luf a right lusty schadow,
Bot in to derne, at the deid, he salbe drup fundin;
He ralis, and makis repet with ryatus wordis,
Ay rusing him of his radis and rageing in chalmer;
Bot God wait quhat I think quhen he so thra spekis,
And how it settis him so syde to sege of sic materis.
Bot gif him self, of sum evin, myght ane say amang thaim,
Bot he nought ane is, bot nane of naturis possessoris.
Scho that has ane auld man nought all is begylit;
He is at Venus werkis na war na he semys:
I wend I josit a gem, and I haif geit gottin;
He had the glemyng of gold, and wes bot glase fundin.
Thought men be ferse, wele I fynd, fra falye ther curage,
Thar is bot eldnyng or anger ther hertis within.
Ye speik of berdis one bewch: of blise may thai sing,
That, one Sanct Valentynis day, ar vacandis ilk yer;
Hed I that plesand prevelege to part quhen me likit,
To change, and ay to cheise agane, than, chastite, adew!
Than suld I haif a fresch feir to fang in myn armes:
To hald a freke, quhill he faynt, may foly be calit.
Apone sic materis I mus, at mydnyght, full oft,
And murnys so in my mynd I murdris my selfin;
Than ly I walkand for wa, and walteris about,
Wariand oft my wekit kyn, that me away cast
To sic a craudoune but curage, that kynt my cler bewte,
And ther so mony kene knyghtis this kenrik within:
Than think I on a semelyar, the suth for to tell,
Na is our syre be sic sevin; with that I sych oft:
Than he ful tenderly dois turne to me his tume person,
And with a yoldin yerd dois yolk me in armys,
And sais, "My soverane sueit thing, quhy sleip ye no betir?
Me think ther haldis yow a hete, as ye sum harme alyt."
Quoth I, "My hony, hald abak, and handill me nought sair;
A hache is happinit hastely at my hert rut."
With that I seme for to swoune, thought I na swerf tak;
And thus beswik I that swane with my sueit wordis:
I cast on him a crabit E, quhen cleir day is cummyn,
And lettis it is a luf blenk, quhen he about glemys,
I turne it in a tender luke, that I in tene warit,
And him behaldis hamely with hertly smyling.

I wald a tender peronall, that myght na put thole,
That hatit men with hard geir for hurting of flesch,
Had my gud man to hir gest; for I dar God suer,
Scho suld not stert for his straik a stray breid of erd.
And syne, I wald that ilk band, that ye so blist call,
Had bund him so to that bryght, quhill his bak werkit;
And I wer in a beid broght with berne that me likit,
I trow that bird of my blis suld a bourd want.

Onone, quhen this amyable had endit hir speche,
Loudly lauchand the laif allowit hir mekle:
Thir gay Wiffis maid game amang the grene leiffs;
Thai drank and did away dule under derne bewis;
Thai swapit of the sueit wyne, thai swanquhit of hewis,
Bot all the pertlyar in plane thai put out ther vocis.

Than said the Weido. i wis ther is no way othir;
Now tydis me for to talk; my taill it is nixt:
God my spreit now inspir and my speche quykkin,
And send me sentence to say, substantious and noble;
Sa that my preching may pers your perverst hertis,
And mak yow mekar to men in maneris and conditiounis.

I schaw yow, sisteris in schrift, I wes a schrew evir,
Bot I wes schene in my schrowd, and schew me innocent;
And thought I dour wes, and dane, dispitous, and bald,
I wes dissymblit suttelly in a sanctis liknes:
I semyt sober, and sueit, and sempill without fraud,
Bot I couth sexty dissaif that suttillar wer haldin.
Unto my lesson ye lyth, and leir at me wit,
Gif you nought list be forleit with losingeris untrew:
Be constant in your governance, and counterfeit gud maneris,
Thought ye be kene, inconstant, and cruell of mynd;
Thought ye as tygris be terne, be tretable in luf,
And be as turtoris in your talk, thought ye haif talis brukill;
Be dragonis baith and dowis ay in double forme,
And quhen it nedis yow, onone, note baith ther strenthis;
Be amyable with humble face, as angellis apperand,
And with a terrebill tail be stangand as edderis;
Be of your luke like innocentis, thoght ye haif evill myndis;
Be courtly ay in clething and costly arrayit,
That hurtis yow nought worth a hen; yowr husband pays for all.

Twa husbandis haif I had, thai held me baith deir,
Thought I dispytit thaim agane, thai spyit it na thing:
Ane wes ane hair hogeart, that hostit out flewme;
I hatit him like a hund, thought I it hid preve:
With kissing and with clapping I gert the carll fone;
Weil couth I keyth his cruke bak, and kemm his cowit noddill,
And with a bukky in my cheik bo on him behind,
And with a bek gang about and bler his ald E,
And with a kynd contynance kys his crynd chekis;
In to my mynd makand mokis at that mad fader,
Trowand me with trew lufe to treit him so fair.
This cought I do without dule and na dises tak,
Bot ay be mery in my mynd and myrth full of cher.

I had a lufsummar leid my lust for to slokyn,
That couth be secrete and sure and ay saif my honour,
And sew bot at certayne tymes and in sicir placis;
Ay when the ald did me anger, with akword wordis,
Apon the galland for to goif it gladit me agane,
I had sic wit that for wo weipit I litill,
Bot leit the sueit ay the sour to gud sesone bring,
Quhen that the chuf wald me chid, with girnand chaftis,
I wald him chuk, cheik and chyn, and cheris him so mekill,
That his cheif chymys he had chevist to my sone,
Suppos the churll wes gane chaist, or the child wes gottin:
As wis woman ay I wrought and not as wod fule,
For mar with wylis I wan na wichtnes of handis.

Syne maryit I a marchand, myghti of gudis:
He was a man of myd eld and of mene statur;
Bot we na fallowis wer in frendschip or blud,
In fredome, na furth bering, na fairnes of persoune,
Quhilk ay the fule did foryhet, for febilnes of knawlege,
Bot I sa oft thoght him on, quhill angrit his hert,
And quhilum I put furth my voce and Pedder him callit:
I wald ryght tuichandly talk be I wes tuyse maryit,
For endit wes my innocence with my ald husband:
I wes apperand to be pert within perfit eild;
Sa sais the curat of our kirk, that knew me full ying:
He is our famous to be fals, that fair worthy prelot;
I salbe laith to lat him le, quhill I may luke furth.
I gert the buthman obey, ther wes no bute ellis;
He maid me ryght hie reverens, fra he my rycht knew:
For, thocht I say it my self, the severance wes mekle
Betuix his bastard blude and my birth noble.
That page wes never of sic price for to presome anys
Unto my persone to be peir, had pete nought grantit.
Bot mercy in to womanheid is a mekle vertu,
For never bot in a gentill hert is generit ony ruth.
I held ay grene in to his mynd that I of grace tuk him,
And for he couth ken him self I curtasly him lerit:
He durst not sit anys my summondis, for, or the secund charge,
He wes ay redy for to ryn, so rad he wes for blame.
Bot ay my will wes the war of womanly natur;
The mair he loutit for my luf, the les of him I rakit;
And eik, this is a ferly thing, or I him faith gaif,
I had sic favour to that freke, and feid syne for ever,
Quhen I cure had all clene and him ourcummyn haill,
I crew abone that cruadone, as cok that wer victour;
Quhen I him saw subject and sett at myn bydding,
Than I him lichtlyit as a lowne and lathit his maneris.
Than woxe I sa unmerciable to martir him I thought,
For as a best I broddit him to all boyis laubour:
I wald haif ridden him to Rome with raip in his heid,
Wer not ruffill of my renoune and rumour of pepill.
And yit hatrent I hid within my hert all;
Bot quhilis it hepit so huge, quhill it behud out:
Yit tuk I nevir the wosp clene out of my wyde throte,
Quhill I oucht wantit of my will or quhat I wald desir.
Bot quhen I severit had that syre of substance in erd,
And gottin his biggingis to my barne, and hie burrow landis,
Than with a stew stert out the stoppell of my hals,
That he all stunyst throu the stound, as of a stele wrappin.
Than wald I, efter lang, first sa fane haif bene wrokin,
That I to flyte wes als fers as a fell dragoun.
I had for flattering of that fule fenyeit so lang,
Mi evidentis of heritagis or thai wer all selit,
My breist, that wes gret beild, bowdyn wes sa huge,
That neir my baret out brist or the band makin.
Bot quhen my billis and my bauchles wes all braid selit,
I wald na langar beir on bridill, bot braid up my heid;
Thar myght na molet mak moy, na hald my mouth in:
I gert the renyeis rak and rif into sondir;
I maid that wif carll to werk all womenis werkis,
And laid all manly materis and mensk in this eird.
Than said I to my cumaris in counsall about,
"Se how I cabeld yone cout with a kene brydill!
The capill, that the crelis kest in the caf mydding,
Sa curtasly the cart drawis, and kennis na plungeing,
He is nought skeich, na yit sker, na scippis nought one syd:"
And thus the scorne and the scaith scapit he nothir.

He wes no glaidsum gest for a gay lady,
Tharfor I gat him a game that ganyt him bettir;
He wes a gret goldit man and of gudis riche;
I leit him be my lumbart to lous me all misteris,
And he wes fane for to fang fra me that fair office,
And thoght my favoris to fynd through his feill giftis.
He grathit me in a gay silk and gudly arrayis,
In gownis of engranyt claith and gret goldin chenyeis,
In ringis ryally set with riche ruby stonis,
Quhill hely raise my renoune amang the rude peple.
Bot I full craftely did keip thai courtly wedis,
Quhill eftir dede of that drupe, that dotht nought in chalmir:
Thought he of all my clathis maid cost and expense,
Ane othir sall the worschip haif, that weildis me eftir;
And thoght I likit him bot litill, yit for luf of otheris,
I wald me prunya plesandly in precius wedis,
That luffaris myght apone me luke and ying lusty gallandis,
That I held more in daynte and derer be ful mekill
Ne him that dressit me so dink; full dotit wes his heyd.
Quhen he wes heryit out of hand to hie up my honoris,
And payntit me as a pako, proudest of fedderis,
I him miskennyt, be Crist, and cukkald him maid;
I him forleit as a lad and lathlyit him mekle:
I thoght my self a papingay and him a plukit herle;
All thus enforsit he his fa and fortifyit in strenth,
And maid a stalwart staff to strik him selfe doune.

Bot of ane bowrd in to bed I sall yow breif yit:
Quhen he ane hail year was hanyt, and him behuffit rage,
And I wes laith to be loppin with sic a lob avoir,
Alse lang as he wes on loft, I lukit on him never,
Na leit never enter in my thoght that he my thing persit,
Bot ay in mynd ane other man ymagynit that I haid;
Or ellis had I never mery bene at that myrthles raid.
Quhen I that grome geldit had of gudis and of natur,
Me thought him gracelese one to goif, sa me God help:
Quhen he had warit all one me his welth and his substance,
Me thoght his wit wes all went away with the laif;
And so I did him despise, I spittit quhen I saw
That super spendit evill spreit, spulyeit of all vertu.
For, weill ye wait, wiffis, that he that wantis riches
And valyeandnes in Venus play, is ful vile haldin:
Full fruster in his fresch array and fairnes of persoune,
All is bot frutlese his effeir and falyeis at the up with.
I buskit up my barnis like baronis sonnis,
And maid bot fulis of the fry of his first wif.
I banyst fra my boundis his brethir ilkane;
His frendis as my fais I held at feid evir;
Be this, ye belief may, I luffit nought him self,
For never I likit a leid that langit till his blude:
And yit thir wisemen, thai wait that all wiffis evill
Ar kend with ther conditionis and knawin with the samin.

Deid is now that dyvour and dollin in erd:
With him deit all my dule and my drery thoghtis;
Now done is my dolly nyght, my day is upsprungin,
Adew dolour, adew! my daynte now begynis:
Now am I a wedow, I wise and weill am at ese;
I weip as I were woful, but wel is me for ever;
I busk as I wer bailfull, bot blith is my hert;
My mouth it makis murnyng, and my mynd lauchis;
My clokis thai ar caerfull in colour of sabill,
Bot courtly and ryght curyus my corse is ther undir:
I drup with a ded luke in my dule habit,
As with manis daill I had done for dayis of my lif.

Quhen that I go to the kirk, cled in cair weid,
As foxe in a lambis fleise fenye I my cheir;
Than lay I furght my bright buke one breid one my kne,
With mony lusty letter ellummynit with gold;
And drawis my clok forthwart our my face quhit,
That I may spy, unaspyit, a space me beside:
Full oft I blenk by my buke, and blynis of devotioun,
To se quhat berne is best brand or bredest in schulderis,
Or forgeit is maist forcely to furnyse a bancat
In Venus chalmer, valyeandly, withoutin vane ruse:
And, as the new mone all pale, oppressit with change,
Kythis quhilis her cleir face through cluddis of sable.
So keik I through my clokis, and castis kynd lukis
To knychtis, and to cleirkis, and cortly personis.
Quhen frendis of my husbandis behaldis me one fer,
I haif a watter spunge for wa, within my wyde clokis,
Than wring I it full wylely and wetis my chekis,
With that watteris myn ene and welteris doune teris.
Than say thai all, that sittis about, "Se ye nought, allace!
Yone lustlese led so lelely scho luffit hir husband:
Yone is a pete to enprent in a princis hert,
That sic a perle of pleasance suld yone pane dre!"
I sane me as I war ane sanct, and semys ane angell;
At langage of lichory I leit as I war crabit:
I sich, without sair hert or seiknes in body;
According to my sable weid I mon haif sad maneris,
Or thai will se all the suth; for certis, we wemen
We set us all fra the syght to syle men of treuth:
We dule for na evill deid, sa it be derne haldin.

Wise wemen has wayis and wonderfull gydingis
With gret engyne to bejaip ther jolyus husbandis;
And quyetly, with sic craft, convoyis our materis
That, under Crist, no creatur kennis of our doingis.
Bot folk a cury may miscuke, that knawledge wantis,
And has na colouris for to cover thair awne kindly fautis;
As dois thir damysellis, for derne dotit lufe,
That dogonis haldis in dainte and delis with thaim so lang,
Quhill all the cuntre knaw ther kyndnes and faith:
Faith has a fair name, bot falsheid faris bettir:
Fy one hire that can nought feyne her fame for to saif!
Yit am I wise in sic werk and wes all my tyme;
Thoght I want wit in warldlynes, I wylis haif in luf,
As ony happy woman has that is of hie blude:
Hutit be the halok las a hunder yeir of eild!
I have ane secrete servand, rycht sobir of his toung,
That me supportis of sic nedis, quhen I a syne mak:
Thoght he be sympill to the sicht, he has a tong sickir;
Full mony semelyar sege wer service dois mak:
Thought I haif cair, under cloke, the cleir day quhill nyght,
Yit haif I solace, under serk, quhill the sone ryse.
Yit am I haldin a haly wif our all the haill schyre,
I am sa peteouse to the pur, quhen ther is personis mony,
In passing of pilgrymage I pride me full mekle,
Mair for the prese of peple na ony perdoun wynyng.

Bot yit me think the best bourd, quhen baronis and knychtis,
And othir bachilleris, blith blumyng in youth,
And all my luffaris lele, my lugeing persewis,
And fyllis me wyne wantonly with weilfair and joy:
Sum rownis; and sum ralyeis; and sum redis ballatis;
Sum raiffis furght rudly with riatus speche;
Sum plenis, and sum prayis; sum prasis mi bewte,
Sum kissis me; sum clappis me; sum kyndnes me proferis;
Sum kerffis to me curtasli; sum me the cop giffis;
Sum stalwardly steppis ben, with a stout curage,
And a stif standand thing staiffs in my neiff;
And mony blenkis ben our, that but full fer sittis,
That mai, for the thik thrang, nought thrif as thai wald.
Bot, with my fair calling, I comfort thaim all:
For he that sittis me nixt, I nip on his finger;
I serf him on the tothir syde on the samin fasson;
And he that behind me sittis, I hard on him lene;
And him befor, with my fut fast on his I stramp;
And to the bernis far but sueit blenkis I cast:
To every man in speciall speke I sum wordis
So wisly and so womanly, quhill warmys ther hertis.
Thar is no liffand leid so law of degre
That sall me luf unluffit, I am so loik hertit;
And gif his lust so be lent into my lyre quhit,
That he be lost or with me lig, his lif sall nocht danger.
I am so mercifull in mynd, and menys all wichtis,
My sely saull salbe saif, quhen sa bot all jugis.
Ladyis leir thir lessonis and be no lassis fundin:
This is the legeand of my lif, thought Latyne it be nane.

Quhen endit had her ornat speche, this eloquent wedow,
Lowd thai lewch all the laif, and loffit hir mekle;
And said thai suld exampill tak of her soverane teching,
And wirk efter hir wordis, that woman wes so prudent.
Than culit thai thair mouthis with confortable drinkis;
And carpit full cummerlik with cop going round.

Thus draif thai our that deir nyght with danceis full noble,
Quhill that the day did up daw, and dew donkit flouris;
The morow myld wes and meik, the mavis did sing,
And all remuffit the myst, and the meid smellit;
Silver schouris doune schuke as the schene cristall,
And berdis schoutit in schaw with thair schill notis;
The goldin glitterand gleme so gladit ther hertis,
Thai maid a glorius gle amang the grene bewis.
The soft sowch of the swyr and soune of the stremys,
The sueit savour of the sward and singing of foulis,
Myght confort ony creatur of the kyn of Adam,
And kindill agane his curage, thocht it wer cald sloknyt.
Than rais thir ryall roisis, in ther riche wedis,
And rakit hame to ther rest through the rise blumys;
And I all prevely past to a plesand arber,
And with my pen did report thair pastance most mery.

Ye auditoris most honorable, that eris has gevin
Oneto this uncouth aventur, quhilik airly happinnit;
Of thir thre wantoun wiffis, that I haif writtin heir,
Quhilk wald ye waill to your wif, gif ye suld wed one?



William Dunbar


William Dunbar's other poems:
  1. The Ballad of Kynd Kittock
  2. Sir Thomas Norny
  3. To the King [In hansill of this guid New Yeir]
  4. Best to Be Blithe
  5. To the Lord Treasurer [Welcome, my awin lord thesaurair]


Poem to print Print

1150 Views



Last Poems


To Russian version


Ðåéòèíã@Mail.ru

English Poetry. E-mail eng-poetry.ru@yandex.ru